A Deputación impulsa un obradoiro de ximnasio de mantemento en Vilariño
08 de agosto de 2023 (13:52 h.)
Preto dunha vintena de persoas participaron nesta actividade enmarcada no programa Depo en Marcha
Arredor de 20 persoas de Cambados iniciaron este luns na Casa da Cultura de Vilariño un obradoiro de ximnasio de mantemento enmarcado no programa provincial Depo en Marcha. Con esta iniciativa, a Deputación de Pontevedra promove a participación e a creación de espazos de encontro e intercambio de experiencias para fomentar a independencia das persoas maiores. O taller, promovido pola Asociación O Batuqueiro de Vilariño e organizado pola institución provincial, celébrase todos os luns ata o 18 de decembro en horario de 20.00 a 21.30 horas.
O curso de ximnasia de mantemento é un dos 130 que se ofertaron na actual edición de Depo en Marcha, que beneficia a arredor de 3.000 persoas ao longo de todo o ano.