A Media Maratón regresa a Vilagarcía como Campionato Galego
Vilagarcía recupera este ano a tradicional Media Maratón, cuxa última edición tivo lugar en 2019, xusto antes da pandemia. O regreso deste vistoso evento deportivo farase por todo o grande, xa que terá a condición de Campionato Galego. É dicir, que da proba de Vilagarcía sairán os campións autonómicos masculinos e femininos das distintas categorías na distancia de 21 quilómetros. Por esta razón prevese que acudan á cita corredores do máis alto nivel da comunidade. A carreira celebrarase o domingo 26 de novembro baixo a organización da Fundación Municipal de Deportes e as directrices da Federación Galega de Atletismo.
Coa Media Maratón, Vilagarcía vai completando o nutrido calendario de grandes eventos que se desenvolven na cidade ao longo do ano, tanto deportivos, como lúdicos, culturais ou de índole económica, poñendo en evidencia, unha vez máis, a capacidade organizativa e loxística do municipio. Ademais de contribuír á dinamización da cidade, estas actividades de grandes dimensións supoñen un atractivo que xera un importante retorno económico, de aí a aposta do Concello por continuar traballando nesta liña.