Abel Losada supervisa o avance da fibra óptica en Sanxenxo

O avance da fibra óptica na provincia de Pontevedra continúa da man do plan ÚNICO-Banda Ancha do Goberno de España. O subdelegado do Goberno, Abel Losada, estivo supervisando os traballos de despregamento na parroquia de Dorrón, en Sanxenxo, acompañado do tenente de alcalde Marcos Guisasola e da concelleira María Deza e agradeceu a colaboración dos 61 concellos da provincia e da Deputación no avance da conectividade.

Desta volta visitou as obras que está a executar a empresa Avatel, concesionaria da convocatoria da subvención estatal do Plan ÜNICO 2022-2023. Ao acto asistiu tamén o delegado da empresa Juan Manuel González, quen explicou que ao longo dos próximos meses garantirá a conexión con fibra ata o fogar FTTH cun mínimo de 300 Megas dun total de 3.364 unidades inmobiliarias (vivendas ou empresas). A empresa está a traballar agora mesmo nun eixe que percorre Sanxenxo, Poio, Pontevedra (Lérez), Campo Lameiro e Cerdedo-Cotobade.

No Concello de Sanxenxo, en concreto, quedarán conectadas cara finais de xuño un total de 700 unidades inmobiliarias e ao longo do ano un total de 1.064. Os cálculos indican que outras 900 vivendas e/ou empresa de Poio beneficiaranse da conectividade e o resto pola zona da parroquia de Lérez en dirección a Campo Lameiro e Cerdedo-Cotobade a partir da Piolla.

Losada destacou que a Subdelegación do Goberno está a realizar un labor de coordinación entre as tres empresas que recibiron subvencións estatais para o despregamento do plan na provincia (Telefónica, Avatel e Rede Aberta) e que deben ter rematado o despregamento antes de decembro de 2025. O Goberno, ademais, recordou o subdelegado, “garante a conectividade a través de enlace satélite co Hispasat ás vivendas ás que sexa imposible chegar co tendido da fibra óptica”.