FEGADACE impartirá unha charla en Sanxenxo para previr o dano cerebral adquirido
A Federación Galega de Dano Cerebral (FEGADACE) organiza en Sanxenxo, na Casa Forestal Social As Canteiras de Noalla, unha actividade de sensibilización sobre o dano cerebral adquirido, unha discapacidade resultante, na maioría dos casos, dun ictus ou dun traumatismo cranioencefálico derivado dun accidente de tráfico.
A sesión informativa, organizada en colaboración coa Escola Galega de Saúde para Cidadáns e os Servizos Sociais do Concello de Sanxenxo, terá lugar o 17 de abril ás 16.30 neste emprazamento situado no número 4 de O Pombal. A actividade está dirixida a todo tipo de público e centrarase na abordaxe das principais causas do dano cerebral, das diversas secuelas asociadas a esta súbita lesión e dos recursos de atención dispoñibles para o colectivo.
A asistencia á charla é de balde, pero é preciso inscribirse previamente no presente formulario ou nos Servizos Sociais de Sanxenxo, chamado ao 986 727 901 ou presencialmente na rúa Rafael Picó número 4 de Portonovo.