EU solicita a Ravella que garanta as 55 prazas de aparcamento público de Villa Güimil

No 2006 o goberno socialista de Gago, sacaba adiante o convenio urbanístico de Villa Güimil. Este contemplaba como única cesión a cambio dunha edificación do 1,5%, a cesión ao concello de 55 prazas de aparcamento para utilización pública no aparcamento soterrado da parcela. Ante a inminencia do remate da obra, "con máis de 15 anos de atraso, é preciso coñecer a data en que se poderá disfrutar destas prazas, ante a evidente necesidade de aparcamento que ten Vilagarcía", sinalan dende o grupo municipal Esquerda Unida.

Dende a formación aseguran que a empresa beneficiaria do convenio urbanístico "incumpriu claramente os prazos de execución, polo que o goberno local debería esixir algunha contraprestación por este incumprimento, que podería e debería ter significado a revogación do convenio, feito que non se produciu polo que a empresa debería compensar ao concello". Solicitan ao goberno local que estableza negociacións coa empresa co obxectivo de acadar a cesión da titularidade da propia Villa Güimil co obxectivo de recuperar este espazo para o desfrute de toda a veciñanza.

O obxectivo, explican, e recuperar do actual estado de abandono no que se atopa, un edificio que forma parte do catálogo de edificios a conservar. A singularidade deste edificio ben dada polo seu estilo arquitectónico ecléctico, con trazas neobarrocasa que o converte en único na nosa Vila e na contorna, exemplo da arquitectura indiana, reflexo dos tempos de prosperidade do barrio.

"A súa recuperación para o patrimonio público, permitiría recupera parte da nosa historia e dotar á contorna dun edificio de uso público tan necesario para albergar todo tipo de actividades no sur do municipio, tan esquecido no investimento deste goberno local", sentencian.