EU solicitará ao goberno duplicar as plazas dos campamentos urbanos de Nadal
O grupo municipal Esquerda Unida manifestou o seu descontento co número de prazas dos campamentos de Nadal ofertados polo Goberno local. Afirman que son "absolutamente insuficientes para o propósito que din buscar, a conciliación das familias nas data de Nadal".
Para o voceiro de EU, Juan Fajardo “os campamentos deben incrementar o rango inicial de idade de 3 a 7 anos para cubir a todos os nenos e nenas ata 12 anos, todo o contrario é simplemente aparentar cubrir o expediente, sen preocuparse pola realidade das familias traballadoras”. Por iso, solicitan o incremento de prazas ata cando menos 75 prazas, e o incremento da franxa de idade de 3 a 12 anos. Ademais ven necesario incrementar os espazos onde se atenda este servizo, de tal forma que se ofreza de forma descentralizada.
"O goberno parece máis disposto a gastar en festas e cemento, que en servizos a cidadanía, xa que esta proposta é unha tomadura de pelo impropia dun goberno progresista que debera incrementar servizos en lugar de precarizalos, por iso en lugar da constante improvisación, o goberno local debería estar proxectanto un espazo permamente para estos servizos, de forma que atenda a totalidade da demanda, en tódalas épocas sen clases no ensino obrigatorio", explican dende a formación.
Así, aseguran que este espazo permamente debería estar dotado de comedor, zonas de lecer, espazos cubertos e incluso aloxamento, de forma que poida ser utilizado para calquera tipo de campamento ou actividade cultural e deportiva que se realice no concello e precise de espazos de atención a infancia ou xuventude, "pero unha vez máis demóstrase que as prioridades do goberno local están lonxe das necesidades da xente, namentras se malgasta en propaganda e bombo para o goberno local", sentencian.