O Atlético Villalonga erra na puntería
O Atlético Vilalonga debeu conformarse cunha igualada no partido da terceira xornada contra a Sociedad Deportiva Huesca. O partido foi dominado polas locais durante a maior parte do tempo, pero faltoulle o acerto nos últimos metros do terreo de xogo para marcar e ficar cos tres puntos na casa. As defensas estiveron por enriba dos ataques no envite e foron chave para comprender o resultado final sen goles.
Os locais arrancaron mellor o enfrontamento e fixéronse co control do balón e da iniciativa. De feito, o bloque celeste dispuxo das mellores oportunidades nese primeiro acto.
Así, a arqueira visitante, Paola Cruz tivo que esmerarse para evitar que o 1-0 chegase ao marcador nos primeiros intres do enfrontamento, con dúas accións case consecutivas nas que salvou o conxunto oscense de verse por debaixo do electrónico.
A escadra vencellada co Pontevedra Club de Fútbol foi perdendo fol co paso dos minutos e o seu rival foi gañando confianza e asentándose sobre o terreo de xogo. De feito, xa no treito final do primeiro acto o Huesca deu a sensación de controlar as embestidas iniciais do Atlético Villalonga.
No segundo tempo, o cadro local amosou máis dificultades para crear e chegar á area aragonesa. De feito, o dominio territorial das locais atopaba resposta en accións por velocidade desenvolvidas en transición polo cadro visitante.
O Huesca mesmo chegou a marcar. Foi nunha contra que finalmente o colexiado lle anulou á Beatriz Mosquera por posición antiregulamentaria, superado o cuarto de hora da reanudación.
Malia a maior posesión de esférico e o seu dominio, o Atlético Villalonga non foi quen de rachar o entramado defensivo do SD Huesca e debeu conformarse cunha igualada.
De tal maneira, o bloque preparado por Edu González suma o seu cuarto punto da temporada e ocupa a oitava posición da liga, despois de tres xornadas nas que obtivo un resultado de cada signo: unha vitoria, unha derrota e un empate.