O deporte volverá a invadir as rúas de Vilagarcía o domingo para a celebración do XIII Triatlón Concello de Vilagarcía. A data confirmouse a semana pasada tras asegurar a empresa concesionaria da obra de Augas de Galicia que o tramo da avenida Valle Inclán estará totalmente despexado e acondicionado para ese día e en perfectas condicións para garantir a seguridade dos participantes na proba deportiva. Como se sabe, a competición estaba prevista inicialmente para 1 de setembro, pero dado que as obras do saneamento ocupaban parte da calzada, por motivos de seguridade e salvagardar a integridade dos ciclistas, decidiuse pospoñer ao domingo 29.
Resolto este obstáculo, a Federación Galega xa confirmou hai días aos clubs da comunidade autónoma a celebración da proba, competición para os que a principios de mes estaban inscritos 81 equipos masculinos e femininos das categorías absoluta, open e escola. Ademais, a proba forma parte do circuíto do Campionato Galego por equipos contra reloxo. As distancias a cubrir adaptaranse a cada categoría.
Así, no Campionato Galego absoluto e no Open os participantes deberán nadar 750 metros, completar 20 quilómetros en bicicleta e correr outros 5 a pé. Na modalidade escolar, a proba de natación terá unha distancia de 300 metros, a ciclista de 10 quilómetros e a carreira pedestre de 2,5.
O evento organizado pola Fundación Municipal de Deportes volverá a ter como epicentro Vilaxoán, xa que a proba de natación realizarase en augas do peirao desta localidade e alí establecerase tamén a liña de saída e meta dos circuítos das carreiras ciclista e pedestre. O circuíto de ciclismo comezará na transición situada na explanada da rúa Preguntoiro pola rúa do Peirao, xirando á esquerda por Avelina Nogueira, para continuar pola rúa Víctor Pita e Valle Inclán ata o punto de retorno situado á altura da rúa Alexandre Bóveda, xa en Vilagarcía, dende onde se regresará de novo por Valle Inclán, continuando por Víctor Pita e rúa Preguntoiro.
Por último, a carreira a pé establécese nun circuíto de dúas voltas para a proba absoluta, comezando dende a zona de transición do peirao de Vilaxoán ata o punto de retorno, regresando polo mesmo porto e continuando pola rúa Preguntoiro ata o final da mesma.
