O delegado do Goberno en Galicia, Pedro Blanco, puxo de relevo o compromiso do Goberno co sector vitivinícola galego, que se materializa nos máis de 10 millóns de euros que se acaban de aprobar para programas de apoio ao sector. Nunha visita á Bodega Attis, situada na parroquia meañesa de Dena, Pedro Blanco explicou que estes fondos do Ministerio de Agricultura, Pesca e Alimentación, veñen de autorizarse na Conferencia Sectorial de Agricultura e Desenvolvemento Rural e serán transferidos á Comunidade Autónoma para impulsar distintas medidas para o sector vitivinícola recollidas na Intervención Sectorial Vitivinícola (ISV).
Así, máis de 3,6 millóns van dirixidos á reestruturación e reconversión de viñedos, co obxecto de mellorar a competitividade do sector, diminuír os custos de produción e facilitar a súa adaptación aos retos de mellora ambiental, no marco da nova Política Agraria Común (PAC). Doutro lado, Galicia disporá de máis de 6,5 millóns de euros da segunda convocatoria de axudas para investimentos da Intervención Sectorial Vitivinícola. Van dirixidos a mellorar as instalacións e as infraestruturas vinícolas, así como os instrumentos de comercialización dos produtos vitivinícolas. Máis de 4,6 millóns transferiranse no 2025 e os 1,9 millóns restantes en 2026.
O delegado do Goberno, estivo acompañado na visita polo subdelegado do Goberno en Pontevedra, Abel Losada, polo alcalde de Meaño, Carlos Viéitez, e polo propietario de Attis, Robustiano Fariña. Ao mesmo tempo, Pedro Blanco lembrou que o PERTE Argoalimentario, que mobilizou na primeira convocatoria 54 millóns de euros, tamén financiou iniciativas empresariais das que forman parte varias adegas galegas. Concretamente, o proxecto Graperte, no que participan Martín Códax, Terras Gauda e Viña Costeira, recibiu achegas por 5,2 millóns.
O PERTE Agroalimentario abrirá a segunda convocatoria en pouco máis dunha semana con outros 300 millóns en apoio do sector, dos que 100 van destinados subvencións e 200 a préstamos. Paro o delegado do goberno “o sector vitivinícola galego é unha potencia dentro de España, que vai seguir contando co respaldo que merece deste Goberno”.
