O subdelegado do Goberno en Pontevedra, Abel Losada, puxo este mércores en valor o intenso traballo desenvolvido dende a Capitanía Marítima de Vilagarcía. Así o fixo durante unha visita as súas dependencias na que estivo acompañado polo capitán marítimo, Juan Andrés Pérez, e o xefe da área de Contaminación da Dirección Xeral da Mariña Mercante, Pablo Pedrosa. O subdelegado compartiu tamén inquedanzas co persoal, onde traballan 21 persoas.
A Capitanía Marítima de Vilagarcía desenvolve unha intensa actividade derivada da tipoloxía das embarcacións que operan nos portos do seu ámbito, a maioría delas de pequeno e mediano tamaño relacionadas coa industria pesqueira. Froito disto é que sexa a segunda Capitanía de España en volume de certificados e a primeira en número de inspeccións.
O subdelegado subliñou a intensa carga de traballo da Capitanía, que no ano 2023 tramitou un total de 3.014 expedientes de rexistro de buques no ámbito da súa demarcación, que ademais de Vilagarcía, abrangue tamén os distritos de Ribeira, Caramiñal, Cambados e O Grove. Só no 2023 rexistráronse 27 buques de nova construción e a transferencia de titularidade doutros 431. Amais, 100 cambiaron o seu nome e 336 solicitaron os correspondentes permisos de navegación. Juan Andrés Pérez explicou que este volume de actividade explícase pola “intensa actividade pesqueira e da industria auxiliar da acuicultura, cun gran número de bateas, na Ría de Arousa”.
A actividade de inspección tamén viuse notablemente incrementada ao longo do pasado ano. En total, desde Capitanía inspeccionáronse 1.248 buques e se emitiron 2.047 certificados dos distintos tipos existentes. Realizáronse 20 inspeccións a buques estranxeiros arribados a Vilagarcía para a emisión do Memorandum of Understanding (MOU) e ademais fixéronse 357 inspeccións de buques con desprazamento nos distintos portos da provincia. Ademais paralizáronse temporalmente 374 buques e definitivamente outros 4.
En relación á actividade sancionadora deste servizo, iniciáronse 103 expedientes sancionadores, dos que 96 concluíron con proposta de resolución e 73 con resolución firme.
Dende esta Capitanía Marítima tamén se despacharon no 2023 preto de 6.000 expedientes relativos ás titulacións náuticas. Abel Losada salientou que nesta oficina se expediron ou renovaron 742 títulos profesionais, 2.541 certificados de especialidade, 5 titulacións náutico pesqueiras e outras 112 deportivas. Ademais expedíronse 660 Libretas de Inscrición Marítima (DIM), que acreditan aos mariñeiros. Neste eido, a Capitanía tramitou ao longo do ano aproximadamente 11.000 enroles e desenroles nas respectivas tripulacións.
A xornada rematou para o subdelegado na sede da Autoridade Portuaria participando na sesión preparatoria dun exercicio de simulacro dunha emerxencia que se vai celebrar mañá no porto de Vilagarcía e que estará supervisada polo xefe da área de Contaminación da Dirección Xeral da Mariña Mercante.
