A portavoz de Sanidade do Grupo Popular, Encarna Amigo, afirmou este xoves no Parlamento galego que a ambulancia medicalizada desprazada a Sanxenxo durante os meses de xullo e agosto xa retornou á súa base no Hospital do Salnés, polo que criticou "o alarmismo inxustificado que intentaron crear o BNG e o PSdeG respecto desta actuación sanitaria, dirixida unicamente a prestar o mellor servizo sanitario á comarca do Salnés durante o período estival".
O PP respondeu así á parlamentaria socialista Paloma Castro, quen acusou á Xunta de "maltratar a Vilagarcía" ao retirarlle a ambulancia. Castro criticou o voto en contra do PP á proposta que presentou este xoves na Comisión de Sanidade para que o Sergas se comprometa a habilitar no verán unha ambulancia a Sanxenxo mantendo a adscrita ao centro hospitalario.
A responsable socialista denunciou que o goberno galego leva varios anos "desvestindo un santo para vestir outro" ao trasladar a ambulancia do Hospital ao centro médico de Baltar, "deixando polo tanto ao Concello de Vilagarcía e limítrofes sen ambulancia medicalizada". Lembra que o incremento de poboación no verán "non é unha circunstancia única de Sanxenxo", e que se repite nos concellos do Salnés, e explicou que Vilagarcía recibiu este ano un 15% máis de turistas. Así, acusou ao goberno galego de "priorizar uns concellos fronte aos outros, e garantir nestes primeiros unha mellor atención aos turistas", desatendendo o principio de equidade entre os territorios ao tomar unha decisión que, a costa de desprazar o servizo a Sanxenxo, deixa desprotexida á poboación de Vilagarcía, A Illa, Vilanova, Caldas de Reis, Catoira ou Valga.
Pola súa banda, Amigo subliñou que "a atención sanitaria estivo sempre garantida en Vilagarcía e en todo o Salnés, porque desde a Fundación Urxencias Sanitarias de Galicia-061 reforzouse a cobertura nesta comarca coa dotación dunha ambulancia asistencial de soporte vital básico, con base no concello vilagarcián".
"O cambio de localización a Sanxenxo da ambulancia medicalizada responde ás necesidades asistenciais existentes durante os meses de xullo e agosto, baseadas nos estudos realizados pola Fundación Pública de Urxencias Sanitarias", explicou a portavoz popular.
Máis en concreto, Amigo dixo que nos meses de xullo e agosto o concello de Sanxenxo aumenta a súa poboación desde os 17.500 habitantes a máis de 120.000, o que levou a trasladar a base da ambulancia de soporte vital avanzado medicalizada ata este municipio co obxectivo de seguir prestando asistencia sanitaria a toda a comarca do Salnés.
