O subdelegado do Goberno en Pontevedra, Abel Losada, visitou na mañá deste martes o Porto de Interese Xeral do Estado de Vilagarcía, onde foi recibido polo seu presidente, José Manuel Cores Tourís. Ambos mantiveron a primeira reunión oficial tras o nomeamento de Abel Losada como subdelegado e realizaron un percorrido polas instalacións portuarias.
No transcurso da visita supervisáronse os principais proxectos para este exercicio que se financiarán con cargo aos fondos do Plan de Recuperación, Transformación e Resiliencia do Goberno de España. Entre eles, prevese licitar a obra do Ferrocarril a Ferrazo, fase III, que permitirá a conexión ferroviaria co peirao de Ferrazo polo viario de enlace do porto, un trazado alternativo ao actual, que evitará a ocupación do peirao de Comboa nas operativas de paso do tren cara Ferrazo. O orzamento estimado da actuación alcanza os 1,4 millóns de euros.
Prevese tamén iniciar o estudo para a implantación da subministración eléctrica a buques (Onshore Power Supply, OPS), que será o primeiro paso para dar cumprimento á normativa europea para a progresiva descarbonización do transporte marítimo.
Por último, está prevista a contratación da redacción do novo Plan Estratéxico, a fin de adaptar o contido desta ferramenta fundamental na planificación portuaria ás previsións do actual Marco Estratéxico do sistema portuario.
Abel Losada e Cores Tourís valoraron a cordialidade dun encontro “moi proveitoso” no que destacaron a importancia estratéxica do Porto de Vilagarcía para o conxunto da provincia e de Galicia, como demostran as cifras de tráfico de mercadorías en 2023, período no que moveu máis de 1,5 millóns de toneladas, establecendo un novo récord anual. Neste 2024, os datos de movemento de mercadorías nos primeiros cinco meses do ano tamén son moi positivos e, con 613.654 toneladas, sitúanse como o terceiro mellor período xaneiro-maio da historia do porto.
