A Praza de Abastos de Vilagarcía estreará antes de que finalice o ano o novo servizo de taquillas intelixentes refrixeradas destinadas a facilitar as compras á clientela do mercado público. A Xunta de Goberno Local adxudicou o subministro e instalación dos equipos á empresa Vofadone España SAU por importe de 46.101,12 euros (IVE incluído). Ademais de rebaixar o prezo de licitación en 14.398,88 euros, a oferta inclúe como melloras o incremento de 3 anos adicionais aos períodos de garantía e de soporte. A adxudicataria dispón do prazo de 2 meses para adxudicar a obra.
A instalación das taquillas intelixentes é unha iniciativa que pon en marcha a Concellería de Promoción Económica para continuar modernizando e mellorando a Praza de Abastos. A acción finánciase con fondos Next Generation concedidos ao programa Vilagarcía Viva no marco do Plan Estatal de Recuperación, Transformación e Resiliencia e dentro da liña de proxectos de mellora, revitalización e resiliencia de mercados tradicionais e zonas comerciais urbanas.
Descarbonización e economía circular
O novo equipamento ten como finalidade mellorar a experiencia de compra do cliente e evitar desprazamentos innecesarios co obxectivo de reducir as emisións de CO2, seguindo as políticas europeas que buscan a sustentabilidade e promoven a economía circular. Ademais, as taquillas implementarán os servizos do mercado público e contribuirán a dinamizalo e a potenciar a súa actividade, xa que o sistema previsto facilitará a recollida flexible dos pedidos fora do horario comercial e, dado que terán sistema de refrixeración, garantindo a frescura e a óptima condición dos produtos.
Para que isto sexa así, o equipamento a instalar estará fabricado integramente en aceiro e formado por 15 taquillas individuais, 10 das cales contarán con sistema de refrixeración (graduable de 2 a 8 grados centígrados) e 5 serán neutras, a temperatura ambiente. Todos os compartimentos deberán contar con pantalla táctil, lector QR e teclado para introducir códigos de forma manual. Os casilleiros deben ser estancos, estar perfectamente illados, ter sistema anti condensación e ser de baixo consumo. O sistema será robusto, antivandálico e apto para resistir ao aire libre.
O contrato inclúe o subministro, instalación, hardward, softward, posta en marcha e soporte do sistema modular das taquillas.
