A Garda Civil imparteu unha charla informativa sobre o Plan Maior de Seguridade no Concello de Ribadumia, que contou coa asistencia dunha vintena de personas. O evento, levado a cabo no auditorio da localidade, foi unha oportunidade para que os asistentes obtivesen información e consellos sobre como protexerse ante as diversas ameazas e situacións de risco.
Este proxecto é unha iniciativa desenvolvida pola Garda Civil co obxectivo de protexer ás persoas maiores, un dos colectivos máis vulnerables da nosa sociedade, proporcionando ferramentas e coñecementos para previr delitos e actuar de maneira segura en diversas circunstancias.
Durante a xornada, os axentes abordaron temas cruciais como a prevención de estafas e fraudes, tanto na contorna física como no ámbito dixital, o uso seguro das tecnoloxías da información, e como actuar en caso de ser vítima de delito. Ademais, destacáronse medidas de seguridade no fogar e na vía pública, ofrecendo consellos prácticos e efectivos para a autoprotección.
Todos os asistentes mostraron grande interese e participaron activamente, expoñendo preguntas e compartindo experiencias personais. Esta interacción permitiu aos axentes adaptar as súas recomendacións ás necesidades específicas do grupo, facendo da sesión unha experiencia enriquecedora e personalizada.
Os poñentes subliñaron a importancia destas iniciativas para fomentar unha cultura de seguridade e prevención. O obxectivo é empoderar aos maiores con información e ferramentas que lles permitan vivir con maior tranquilidade e seguridade.