A Deputación de Pontevedra acaba de rematar as obras de mellora da mobilidade peonil no último treito da EP-8004 Caldas-Vilanoviña ao seu paso polos núcleos de Lantañón
e Vilanoviña, no Concello de Meis. A deputada provincial de Infraestruturas Públicas, Mobilidade e Contratación, Isabel Couselo, ven de visitar, acompañada da alcaldesa de Meis, Marta Giráldez, e doutros membros da corporación local, o remate dunhas obras que permitiron corrixir as deficiencias que presentaba esta infraestrutura provincial para garantir o tránsito peonil en condicións de seguridade.
As obras realizáronse nun treito de 400 metros cunha alta concentración de vivendas e permitiron dotar este espazo dun itinerario peonil coa construción dunha senda de 2,50 metros, ao nivel da calzada, para que os peóns non tivesen que realizar os seus tránsitos pola pequena beiravía coa que contaba a estrada antes da mellora, sen garantir a seguridade da circulación a pé ao non ser unha área reservada a este fin. Ademais, executouse unha nova rede soterrada de recollida de augas pluviais a longo de toda a zona de actuación, así como do alumeado público. Tamén se colocaron novas luminarias LED de alto rendemento e menor consumo enerxético.
A Deputación investiu nesta mesma vía un millón de euros, financiados integramente pola institución provincial, para mellorar o firme ao longo de todo o seu trazado, de máis de oito quilómetros e que comprende os concellos de Caldas de Reis, Meis, Portas e Vilanova de Arousa. No caso da actuación de Meis visitada esta mañá pola deputada Isabel Couselo, tamén foi financiada integramente pola institución provincial xa que a Deputación achegou o 80% (160.000 euros) e o 20% que correspondía ao Concello (40.000 euros) foi sufragado cos fondos do plan provincial de cooperación cos municipios.
