Os campamentos da Lanzada da Deputación de Pontevedra chegan ao seu fin este verán cos últimos cativos que entrarán nas instalacións do Grove este domingo, 1 de setembro. Serán en total 140 nenas e nenos de 24 concellos da provincia que ao longo de seis días, ata o sábado 7 de decembro, poderán gozar do seu tempo de lecer a través de actividades de carácter educativo, cultural, deportivo e formativo. Con este grupo, pasaron polo campamento da Lanzada un total de 1.540 menores de 57 concellos da provincia.
Os nenos e nenas do campamento gozarán dun amplo programa de actividades de multiaventura e tempo libre, algunhas delas en lingua inglesa, entre as que se atopan xogos e deportes, actividades na praia ou ao aire libre relacionadas co medio natural, así como artísticas e nocturnas. Tamén teatro, contacontos, baile ou actividades culturais. Ademais, realizarán un obradoiro para elixir a mascota oficial deste programa provincial durante o próximo ano, visitarán a Illa de Ons e realizarán unha segunda excursión cultural, deportiva ou relacionada coa natureza e o coidado do medio ambiente.
Os rapaces que chegarán esta semana ás instalacións da Deputación en San Vicente do Grove, todos eles nados entre os anos 2011 e 2016, proceden dos concellos de Baiona (1), Barro (2), Cangas (1), A Cañiza (2), Cuntis (2), Gondomar (1), O Grove (3), A Guarda (2), Lalín (1), Meis (1), As Neves (1), Nigrán (1), Poio (6), Pontevedra (21), O Porriño (1), Portas (1), Redondela (2), O Rosal (2), Salceda de Caselas (4), Sanxenxo (5), Soutomaior (1), Valga (1), Vigo (77) e Vilagarcía de Arousa (1).