A campaña de Nadal dos bonos Son da Casa! arrincou o sábado 3 de decembro. Os bonos compra subvencionados polo Concello pódense adquirir de forma online a través da páxina web. Malia isto, como en anteriores edicións, para facilitar a adquisición ás persoas que non se manexen coas novas tecnoloxías ou non as teñan a súa disposición, a Concellería de Promoción económica habilitou o punto de venta física no marco do mercado de Nadal instalado na Praza da II República. Nesta primeira xornada poranse á venta 300 bonos en horario de 11 a 13.30 horas. Para a compra debe presentarse o DNI do comprador. Tanto na compra física como na online, cada persoa maior de idade poderá adquirir un máximo de dous packs de bonos.
Os lotes custan 20 euros e permiten facer compras por importe de 30 grazas ao 10 euros que aporta o Concello. Os bonos poderanse gastar nos máis de 200 establecementos comerciais, de hostalaría e pequenos negocios de Vilagarcía que están adheridos á campaña. A oferta é moi ampla, xa que participan dende tendas de aliment ación, calzado, téxtil, complementos e perfumerías; ata ferraxerías, tendas de música, perruquerías, carpinterías e paxarerías; pasando por clínicas de fisioterapia ou tendas de informática, bares e restaurantes). Todos eles identificaranse co logo da campaña no escaparates e tamén se pode consultar a lista completa na web do Son da Casa!.
Na que xa é a quinta edición da campaña de bonos, o Concello volve a poñer á venta 3.750 packs de bonos co obxectivo de incentivar o consumo no comercio e hostalería local e dinamizar a economía da cidade tras os efectos negativos causados a consecuencia da pandemia e da crise económica e para axudar aos cidadáns a afrontar un pouco mellor as compras de Nadal e o incremento xeneralizado dos prezos.